«ايلىدا» وتكەن ماعىنالى باس قوسۋ _ ىلە كەشى گازەتى مەكەمەسىنىڭ تۇڭعىش رەتكى «قارعالداق» اتىنداعى سيلىقتى ولەڭ باسەكەسىنىڭ سيلىق تاراتۋ سالتى دابىرالى وتكىزىلدى

(1) سيلىق العان اقىندار اتىنان ءجۇنىسقان باقاي ءسوز سويلەۋدە.

 (2) دەمەۋشى ورىن-موڭعۇلكۇرە اۋدانى قوناقاي اۋىلدىق پارتكومنىڭ ورىنباسار شۋجيى، اقىن نۇرحالەل نۇرسالين لەبىز بىلدىرۋدە.

(3) «ىلە گازەتىنىڭ» ورىنباسار باس رەداكتورى ساۋلەت توقتىبايەۆ (ورتادا) 1 - دارەجەلى سيلىق يەگەرىنە سيلىق بەردى.

(4) ىلە گازەتى مەكەمەسى قازاق رەداكسياسىنىڭ مەڭگەرۋشىسى باقىتبەك نەسىپبەك ۇلى 3-دارەجەلى سيلىق يەگەرلەرىنە سيلىق بەردى.

(5) ىلە كەشى گازەتى مەكەمەسى قازاق رەداكسياسىنداعى جۋرناليستەر ەستەلىك قالدىردى.

(6) اقىندار، جۋرناليستەر اڭگىمەدە.

(7) جاقسى ولەڭ سيلىعىنىڭ يەگەرلەرى سيلىق الۋدا.

«ىلە كەشى» گازەتىنىڭ ءتىلشىسى جاڭىلقان قوجا قىزى حابارلايدى. جەلتوقساننىڭ 17- كۇنى ىلە كەشى گازەتى مەكەمەسى موڭعۇلكۇرە اۋدانى قوناقاي اۋىلدىق پارتكوم مەن حالىق ۇكىمەتىنىڭ دەمەۋىندە وتكىزىلگەن تۇڭعىش رەتكى «قارعالداق» اتىنداعى قىسقا ولەڭ باسەكەسىنىڭ سيلىق تاراتۋ سالتىن جانە اۆتورلارمەن باس قوسۋ قيمىلىن قۇلجا قالاسىنىڭ حالىق باقشاسىنداعى «ايلى» ساياجايىندا وتكىزدى.

وسى جولى «ىلە كەشى» گازەتىندە وتكىزىلگەن سيلىقتى ولەڭ باسەكەسىندە جۇڭگو كوممۋنيستىك پارتياسى قۇرىلعاندىعىنىڭ 90 جىلدىعىن، رەسپۋبليكامىز قۇرىلعاندىعىنىڭ 62 جىلدىعىن قۇتتىقتاۋ بايلانىسىمەن پارتيانى، وتاندى، تۋعان جەردى جىرلاۋ نەگىزگى تاقىرىپ ەتىلگەن بولاتىن. بيىلعى جىل جۇڭگو كوممۋنيستىك پارتياسى قۇرىلعاندىعىنىڭ 90 جىلدىعى بولعاندىقتان، مەملەكەت كولەمىندە پارتيانى جىرلاۋ قيمىلى كەڭ كولەمدە جىل بويى دابىرالى وتكىزىلىپ كەلدى. وسى مەرەيلى قيمىلعا ءۇن قوسقان ىلە كەشى گازەتى مەكەمەسى ۇستەگى جىلى «قارعالداق» اتىنداعى شاعىن سيلىقتى ولەڭ باسەكەسىن وتكىزۋدى جوسپارلاعان ەدى. بۇل قيمىل مەكەمە باسشىلارىنىڭ قولداۋىندا، موڭعۇلكۇرە اۋدانى قوناقاي اۋىلدىق پارتكومنىڭ، حالىق ۇكىمەتىنىڭ ەكونوميكالىق جاقتان دەمەۋىندە، اۆتونوميالى رايونىمىز كولەمىندەگى اقىنداردىڭ اتسالىسۋىندا ناتيجەلى ۇيىمداستىرىلدى. ولەڭ باسەكەسىندە رەداكسياعا اۆتونوميالى رايونىمىز كولەمىنەن 60 قا تارتا تۋىندى جولداندى. مۇنىڭ ىشىندە 40 قا تارتا تۋىندى گازەتتە جانە سەلبەسۋشى ورىن پاراسات تور بەكەتىنىڭ تور بەتىندە جاريالاندى.

بيىل «ىلە كەشى» گازەتىنىڭ شىعا باستاعانىنا 18 جىل تولدى. حالىقتىڭ قالاۋىنان شىعىپ كەلە جاتقان جاس گازەتتىڭ وقىرمانداردىڭ قولداۋىنا، كومەگىنە ءزارۋ ەكەندىگى، كەلگەن سيلى قوناقتاردىڭ سىن، ۇسىنىس - پىكىر بەرۋى قاجەتتىلىگى باس قوسۋ مازمۇنىنان قاعىس قالمادى.

ىلە گازەتى، ىلە تەلەۆيزياسى، ىلە حالىق راديو ستانسياسى، شينجياڭ ايەلدەرى، ىلە جاستارى سياقتى اقپارات ورىندارىنان كەلگەن سيلى قوناقتار «اسىل تاستان،  اقىل جاستان» دەگەن وسى دا دەپ القاۋ ايتىسىپ، ءازىل - قالجىڭدارىمەن جەلپىپ، بۇل قيمىلدىڭ بۇدان كەيىن دە جالعاسىن تابا بەرۋىنە تىلەۋلەستىك ءبىلدىردى. ولەڭ ارقىلى ءبىرىن ءبىرى بىلەتىن اقىندار دا كەلە سالىپ توسىرقامادى، اق تىلەكتەرىن ءبىلدىرىسىپ، جىردان شاشۋ شاشىپ، قيمىلدىڭ سالتاناتىن اسىردى. قيمىل ارالىعىندا وسى رەتكى سيلىقتى ولەڭ باسەكەسىندە سيلىق العان اقىندار اتىنان ءجۇنىسقان باقاي ءسوز سويلەپ، قيمىلدىڭ تابىستى وتكىزىلگەنىن قۇتتىقتادى، قيمىلدى وتكىزگەن ىلە كەشى گازەتى مەكەمەسىنىڭ باسشىلىق القاسىنا، قيمىلدى دەمەگەن موڭعۇلكۇرە اۋدانىنىڭ قوناقاي اۋىلىنا راقىمەت ايتتى ءارى ءوزىنىڭ 4 كىتابىنان 8 نۇسقا كىتاپتى نۇرحالەل نۇرسالينگە ەستەلىك رەتىندە ۇسىنىپ، ونىڭ جاسامپازدىعىنا تابىس تىلەدى.

دەمەۋشى ورىننىڭ ۋاكىلى، قوناقاي اۋىلدىق پارتكومنىڭ ورىنباسار شۋجيى، اقىن نۇرحالەل نۇرسالين كوپشىلىكتىڭ ءىلتيپاتىنا ريزاشىلىعىن بىلدىرە كەلىپ، اقىندارعا مىعىم دەنساۋلىق، زور جاسامپازدىق تابىس تىلەدى، مادەنيەتتى دامىتۋ ىستەرىنە بۇدان كەيىن دە مۇمكىندىگىنشە اتسالىساتىندىقتارىن ءبىلدىردى.

اق ۇلپامەن ورانعان كورىكتى قىس مەزگىلىندە كوركەم قۇلجا قالاسى اسەم جىردان القا تاعىنىپ، كۇمبىرلى كۇيدەن ساۋعا الىپ، مىڭ بۇرالعان بيمەن ءوز مەرەيىن اسىردى. اقىندار «سۇلۋدىڭ توسەگى، اقىننىڭ بەسىگى، اح! قۇلجا...» دەپ اقىن نۇرلان ءابدىلدا ۇلىنىڭ جىرلاعانىنداي، جان دۇنيەسى ولەڭگە اينالىپ، اق ۇلپا بوپ سەبەلەپ، جان - جاققا تاراسىپ جاتتى...

 سۋرەتتەردى تۇسىرگەن: باقىتبەك ءجۇمادىل ۇلى